De Bergkant Lodge


Hierdie pragtig gerestoureerde en uitgebreide Kaaps-Hollandse huis, oorspronklik van die middel 1800's, is die toonbeeld van Karoo-gasvryheid en elegansie en het ‘n ryk geskiedenis.

 

Die 'De Bergkant Lodge', een van die agtien gewelhuise in die dorp, is gebou deur Carel Lotz, skepper van die Prins Albert gewels, as 'n huweliksgeskenk vir sy dogter, Petronella, toe sy in 1858 met Helmuth Luttig trou.

 

Die Kaaps-Hollandse huis het baie fyn kenmerke: pragtige skuifraam-vensters, elegante deure en hoë houtplafonne. Ná Helmuth se dood is Petronella met 'n plaaslike boer, Christoffel Neethling, getroud, wat twee klip-vakmanne van Madagaskar in diens geneem het om die klipmuur te bou wat 'n deel van die eiendom omring.

 

Die 'De Bergkant Lodge' is ingerig met pragtige antieke meubels wat deur die jare liefdevol versamel is. Die omliggende tuine is weelderig en groen met baie skadubome.